آذر ساو

تورکجه خبر

اورتاق تورک دیلی: نه ائتمه‌لییک، نئجه ائتمه‌لییک؟ l فریدون جلیلوو

0 گؤروش
یازار:‌ ائلدار


گوندَمدن دوشمه‌یَن موضوع لاردان بیری ده اورتاق تورک دیلی نین یارادیلماسی مسئله سی دیر. موختلیف ایللرده بونونلا باغلی چوخسایلی قورولتایلار، توپلانتیلار کئچیریلسه ده، مسئله حلّینی تاپماییب. اورتاق تورک دیلینین یارادیلماسینی ضروری ائدن، بو یولدا آتیلمالی اولان آددیملار نَدن عیبارتدیر؟ تانینمیش تورکولوق، فیلولوژی علم لری دوقتورو، پروفسور فریدون جلیلوو نوواتور.آز-این امکداشی ایله صُحبتینده بیلدیریب کی، اورتاق دیل مسئله سی چوخ آغیر موضوع دور: "اونون اینجه‌لیکلرینی بیلمه‌دن "اورتاق دیل یاراداق" ،"بیرلَشک" شکلینده شوعارلار وئرمکله ایش گئتمز. بو، چوخ جیدّی آراشدیرما، اوزَرینده چوخ جیدّی ایشله‌مه طلب ائدن بؤیوک مسئله دیر. اورتاق تورک دیلی موجود اولوب واختیله. اورتا عصرلرده ایکی اورتاق تورک دیلی وار ایدی. بیری قافقازدا، ایراندا، تورکیه‌ده و اورتا آسیانین بعضی بؤلگه‌لرینده ایشلنن اورتاق دیل ایدی کی، بونا تورکی دیلی دئییردیلر. او دیلده مکتوبلار یازیلیر، اینسانلار بیر-بیری ایله اُنسیّت قوروردولار. بیر ده بیر آز قیپچاق دیلینه یاخین اولان و اؤزبکلرین، اویغورلارین ایشلتدیگی جیغاتای دیلی وار ایدی. آذربایجاندا اولان تورک دیلی نه اینکی تورکلرین، حتّی قافقازدیللی خالقلارین دا اورتاق دیلی اولوب. روسلار قافقازا گلمه‌میشدن بو بؤلگه‌نین خالقلاری همین اورتاق دیلده دانیشیردیلار. حتّی ۱۹۳۶-جی ایله قدر داغیستانین آنا یاساسیندا تورک دیلی دولت دیلی ایدی. اون یئددی عصرین ۷۰-جی ایللرینده بیر فرانسه لی میسیونر گلیب آذربایجانین گونئیینی و قوزئیینی گَزیر، سونرا شاماخیدا بؤلگه‌نین اورتاق دیلی حاقیندا کیتاب یازیر. کیتابین آدی بئله‌دیر: "سؤز تورکی". بیر نسخه‌دن عیبارت اولان بو کیتاب سوئد ده کیتابخانادا ساخلانیر. اۆزۆنۆ کؤچوروب منه گؤندردیلر، من اونو چاپا حاضیرلادیم، آما مادّی ایمکان اولمادیغی اوچون ائله اَل یازما شکلینده ده قالدی، چاپ ائده بیلمه‌دیم. همین میسیونر اوچ-دؤرد عصر اول بو دیلین فاکتلارینی اورتایا قویوب. اونون کیتابینی ایسه جمعی ایکی نفر اوخویوب. بیر سوئدلی یوهانسون آدلی تورکولوق، بیر ده من. داها اوچونجو آدامین او کیتابدان خبری یوخدور.

تَخمینن ۳۰ ایل اؤنجه آنکارادا گؤروشنده یوهانسون منه دئدی کی، او دا "سؤز تورکی"نی چاپا حاضیرلاییب، آما چاپ ائتمه‌یه ایمکانی یوخدور. میللی علم لر آکادئمییاسینین نسیمی آدینا دیلچیلیک موسسه سی بو جور کیتاب و یا الیازمالاری تاپیب چاپ ائلمه‌لیدیر. آفاناسی نیکیتین "اوچ دنیز آرخاسیندا" کیتابینی روسجا یازیب آما او اثرین بیر چوخ یئرینده اورتاق تورک دیلی دئدیگیمیز آذربایجان تورکجه‌سینده جومله‌لر وار. یوزلرله بئله فاکت سایا بیلرم کی، آذربایجان تورکجه‌سی بو بؤیوک اراضیده اورتاق تورک دیلی کیمی ایشله‌نیب. آذربایجان تورکجه‌سی اوغوز دیلیدیر. بو اوغوز دیلی گونئیلی-قوزئیلی آذربایجاندا، بوتون قافقازدا، آنادولودا، تورکمنیستاندا ایشله‌نیب. هئچ اولماسا بو اراضیلرده یاشایان تورک خالقلاری اوچون بیر اورتاق دیل درسلیگی حاضیرلاماق لازیمدیر کی، یئنیدن او دؤنمه قاییتماق اولسون. سونرادان جیغاتای دیلینی ده بورا علاوه ائتمکله بیر عمومی درسلیک اورتایا قویماق اولار. آما بونلار آغیر ایشدیر، بؤیوک زحمت طلب ائدیر. میللی علم لر آکادِمیسینین دیلچیلیک موسسه سینه میللی روحلو بیر آکادمیک رهبرلیک ائدیر – محسن ناغیسویلو. بو یؤنده چوخ ایش گؤرورلر. سادجه اولاراق دستک وئریب اونلارین گؤردویو ایشی بیلیم یوردو توپلانتیلاریندا و دیگر یئرلرده، خُصوصن تلوزیوندا تبلیغ ائتمک لازیمدیر. آرادا او شوو وئرلیش لرینین یئرینه بئله میللی مسئله‌لرله باغلی موضوع لار اِئفیره چیخاریلمالیدیر". فریدون جلیلووون فیکریجه، اورتاق تورک دیلینین یارادیلماسی اوچون تاریخده اولانلاری تبلیغ و برپا ائتمک لازیمدیر: "توتالیم، قازاخلا آذربایجان تورکو بیر-بیری ایله چتین آنلاشیر. آما بیر هفته قازاخیستاندا یاشایاندا دانیشا بیلمه‌سه ن ده او لهجه‌نی تام باشا دوشورسن. یعنی تورک دیللری هیند-آوروپا و باشقا دیللردن فرقلی اولاراق آنا کؤکونو ساخلاییب. او آنا کؤکون اۆزَرینده معین ایشلر آپارماق لازیمدیر. بیرینجی مرحله ده اوغوز تورکجه‌سی اوچون، ایکینجی مرحله ده قیپچاق دیللری اوچون آیریجا اورتاق دیل درسلیگی یاراتماق، سونرا بو ایکی اورتاق دیلین ماتِریاللارینی علمی شَکیلده اوزلاشدیرماق اولار کی، اوچونجو، یعنی اساس سئچَنَک(گزینه) اوچون نَه یی ساخلاییب نَه یی ایختیصار ائتمه‌لی اولدوغوموزو بیلک. همچنین تبلیغات بئله آپاریلمالیدیر کی، اورتاق دیل یئرلی لهجه لرین سیرادان چیخماسینا سبب اولمایاجاق، او مقصدی گۆدمۆر. قازاخ اؤز لهجه‌سینده، قیرغیز اؤز لهجه‌سینده، آذربایجان تورکو اؤز لهجه‌سینده یازیب-اوخویاجاق، آما علاوه اولاراق اورتاق تورک دیلینی اؤیرنه‌جک کی، باشقا تورک دولتی نه گئدنده او دیلده دانیشا بیلسین. بونون علمی یوللاری وار. بو ایشی ناشی آداملارین عهده سینه بوراخماق اولماز. خالق آراسیندا بو سۆرَج گئدیر. آذربایجاندا آنادولو تورکجه‌سی سریال لار، وئریلیشلر، خبرلر واسیطه‌سیله بوتون ائولره گیریب. دولت مستقل لیگیمیزی برپا ائدندن بَری بیز تورکیه‌دن یوزلرله سؤز آلیب ایشله‌دیریک. بو یاخشی حالدیر، اورتاقلیغا آپاران یولدور. آما تورکیه‌ده بونو ائتمیرلر. چونکو اوردا بو تبلیغات گئتمیر. یالنیز سون زامانلار چوخ آز سایدا، بیر نئچه مکتبده آذربایجان تورکجه‌سی ایله آنادولو تورکجه‌سی آراسینداکی فرقلری شاگیردلره اؤیرتمه‌یه باشلاییبلار.

اصلینده آذربایجان تورکجه‌سی تورک دیللری ایچَریسینده ان گؤزل و ان مکمل دیر، لاکین بیز بونو تبلیغ ائده بیلمیریک. آنادولو تورکلری بیزدن چوخ سؤز گؤتوره بیلرلر، لاکین ائتمیرلر. بونون دا موختلیف سببلری وار. بیر طرفدن تورکیه ۶۰۰ ایل پادشاهی اولموش دولت دیر دئیه دیگر تورک خالقلارینا بیر آز بؤیوک قارداش کیمی باخیر. ان بؤیوک سهوی ده بودور. بو گون گونئی آذربایجاندا اولان تورکچولوک نه قوزئی آذربایجاندا وار، نه ده تورکیه‌ده. دیگر طرفدن تورکیه‌ده بو مسئله ایله مشغول اولان عالیملر ایچریسینده گله‌جگی گؤره بیلَنلر چوخ آزدیر. گؤره بیلنلر ده "توران" ،"ارگنکون" شوعارلاری ایله گونده‌می دولدوران، علم دن اوزاق اینسانلاردیر. اورتایا اساسی ایش قویان یوخدور. بو ایش اوچون هم سیاسی ایراد، هم ده فردلرده حقیقی تورک روحونون اولماسی لازیمدیر. من همیشه تورکیه‌ده دئییرم کی، بیز باکیدان ایستانبولا "طیاره" ایله گلیب "اوچاق"لا قاییدیریق. بو زامان "اوچاق" اولور بیزیم اورتاق سؤزوموز. سیز ده "آناهتار"لا گلیب "آچار"لا قاییدین. باخ، بو مکانیسمی محض اونون سورونونو بیلن اینسانلارین رهبرلیگی آلتیندا ایشه سالماق لازیمدیر کی، مکانیسم گؤزلنمز فسادلار وئرمه‌سین". فریدون جلیلووا گؤره، خصوصی مقام اورتاق الیفبا مسئله سیدیر: "هر دفعه قید ائدیرم کی، اول اورتاق الیفبا اولمالیدیر، سونرا اورتاق دیل. ۳۰ ایلدیر اورتاق الیفبا مسئله سی گئرچکلشمیر. حالبوکی ۳۰ ایل قاباق تورک اؤلکه‌لرینین تانینمیش عالیملری ایستانبولدا کئچیریلن قورولتایدا موختلیف لایحه‌لری مذاکیره‌یه قویدولار و ۳۴ حرفدن عیبارت اورتاق الیفبا قبول ائتدیلر. هامیسی دا بونا ایمضا آتدی. تورکیه‌لیلر ایندیکی الیفبالارینا ایکی-اوچ حرف آرتیرسایدیلار همین اورتاق تورک الیفباسینی قبول ائتمیش اولوردولار. آما ۳۰ ایلدیر بونو ائده بیلمیرلر. بیز ایسه اونو بوردا حیاتا کئچیرمیشیک و ۲۶ ایلدیر ایشله‌دیریک. تاتارلار دا همین اورتاق الیفبانی ایشله‌دیر. آما بو گون اورتا آسیاداکی اؤلکه‌لر اؤزلری یئنی الیفبا یارادیرلار کی، بو دا اورتاقلیق مسئله سینه ضیددیر. بیز ۱۹۹۱-جی ایلده لاتین قرافیکالی یئنی الیفبانی آذربایجان مجلیسیندن کئچیردنده (همین واخت فریدون جلیلوو میللت وکیلی ایدی؛ ۱۹۹۲−۱۹۹۳-جو ایللرده ایسه او، باش باخانین معاوینی، خالق تحصیلی باخانی، عالی و اورتا ایختیصاص تحصیلی باخانی وظیفه‌لرینده چالیشیب) چوخ بؤیوک تضییق لر وار ایدی. اورتاق الیفبا مسئله سی ایله باغلی قازاخیستاندان بورا بئش-آلتی پروفسور گلمیشدی. اونلارا بو سۆرجی حیاتا کئچیرمگین یولونو ایضاح ائتدیم، چتینلیکلرینی باشا سالدیم، چوخ راضی گئتدیلر. سونرا منه خبر گؤندردیلر کی، اورتاق الیفبا مسئله سینی رئاللاشدیرا بیلمیریک، مانع اولانلار وار. اؤزبکیستاندا دا بو جور اولدو، تورکمنیستاندا دا. اورتاق الیفبا یالنیز بیزده، کریم تاتارلاریندا و تاتاریستاندا ایشله‌نیر. ائله مسئله‌لر وار کی، آچیق دئمک اولمور. واختیله آتاتورکو ده چاشدیریبلار، تورکیه‌ده ایندیکی الیفبانی قبول ائدیب. حالبوکی او واخت بوتون تورک اؤلکه‌لرینین ایستیفاده ائتدیگی اورتاق الیفبا وار ایدی. ۱۹۲۶-جی ایلده باکیدا کئچیریلن بیر تورکولوژی قورولتایدا اورتاق الیفبا قبول ائدیلمیشدی و بیز اونو ۱۹۳۹-جو ایله قدر ایشلتدیک. سونرادان استالین اونو لغو ائتدی و کیریل الیفباسینا کئچیلدی. تورکیه لاتین الیفباسینی همین اورتاق الیفبا بیزده ایشلندیگی دؤورده قبول ائتمیشدی". پروفسور جلیلوو اورتاق دیلین سیرادان چیخماسینین سببلری آراسیندا بونلاری دا قید ائدیر: "روسلارین گلیشیندن سونرا قافقازدا پروسئسلر دییشدی. روس دیلی اورتاق دیل کیمی تورک دیلینی سیخیشدیردی. گونئی آذربایجاندا ایسه فارس دیلی سون یوز ایلده دولت سیاستی شکلینده تورک دیلینی سیخیشدیرماقلا مشغولدور. فارس پرست عالیملر، خصوصن روسلار یازیر کی، گویا آذربایجانین هم قوزئیی، هم ده گونئیینده اول لر آیری خالقلار اولوب، بوردا تورکلشمه سلجوقلار گلندن سونرا باشلانیب. فاکتلار ایسه بونون عکسینی گؤستریر. اودور کی، آذربایجاندا عصرلرله فارسلاشما گئدیب و بو گون ده گئدیر. آنادولو تورکجه‌سینده ایسه ایکی دیل یارانیب: بیر آذربایجان تورکجه‌سی ایله عینی تشکیل ائدن خالق دیلی، بیر ده ایستانبول لهجه‌سی".

آردینی اوخو
چهارشنبه 24 بهمن 1397
بؤلوملر : یازارلار,

یورغونلوغو آزالدان ۵ یول

0 گؤروش
یازار:‌ ائلدار


دوزگون و ساغلام بیر شکیلده قیدالانماق بدنیز اوچون اولدوقجا اؤنملیدیر. داها انرژیلی اولماق و گونلوک ایشلرینیزی ائده بیلمک اوچون طبیعی قیدا یئمگی اونوتمایین.

یاتاغینیزا ایش گؤتورمگین 

یاتمازدان اول یاتاغینیزا ایش آپارماقدان واز کئچین. بو وضعیت یئمک و یا تلوزیون ایزله‌مک کیمیدیر. یاتاغینیزی یالنیز یاتماق اوچون ایستیفاده ائده بیلرسینیز. بئینیزی بونا آلیشدیرسانیز، بدنینیز یاتاغی دینجلمه و یاتماق یئری اولاراق گؤرمیه‌جک و بورا راحات یوخو یئری اولماقدان چیخاجاقدیر. 

سو ایچمگی یاددان چیخارمایین 

سو بدن اوچون اولدوقجا واجیبدیر. هر گون یئترلی سو ایچدیگینیزه امین اولمالیسینیز. سوسوز قالدیقدا بئینیز راحات ایشله‌مز و بونون نتیجه‌سینده ده راحات یاتا بیلمزسینیز. 

یاتمادان اول ایستی بیر دوش آلماغا چالیشین 

یاتماغی دوشونورسونوزسه، موطلق ایستی بیر دوش آلمالیسینیز. بو، راحاتلامانیزا کؤمک اولار و سیزی یوخویا حاضیرلایار. 

طبیعی بیتکیلردن ایستیفاده ائتمگی اونوتمایین 

داها یاخشی دینجلمگینیز و اؤزونوزو یورغون حیس ائتمَمگینیز اوچون بیر چوخ فرقلی بیتکیلر وار. کاهی یارپاغی، سولماز چیچگی و پیشیک اوتو کیمی بیتکیلرین چایلارینی ایچه‌رک بدنینیزی و بئینیزی راحاتلایا بیلرسینیز.

آردینی اوخو
دوشنبه 22 بهمن 1397
بؤلوملر : ساغلیق,

قوزئی آذربایجانلیلار گوگل ده نه آختاریر؟

0 گؤروش
یازار:‌ ائلدار

چاغداش و مُعاصیر اینسان اؤزونه لازیم اولان بوتون بیلگی لری اینترنتده آختاریر. "یاز، چیخاجاق" ، - هانسیسا معلوماتی آختاراندا بو، اَن چوخ ائشیتدیگیمیز سؤز اولور. 
بس آذربایجانلیلار "گوگل"-ده اَن چوخ نه آختاریرلار؟ 

بونو سیزه گؤسترمک اوچون توران رمضانلی دونیانین اَن مشهور آختاریش ماشینینین بیلگی لرینه اساسلاناراق، خصوصی اینفوقرافیکا حاضیرلاییب.

آردینی اوخو
یکشنبه 21 بهمن 1397
بؤلوملر : اینفوگرافیک,

چینین اویغور تورکلرینه‌ ظولمو نیویورک تایمزدا

0 گؤروش
یازار:‌ ائلدار


نیویورک تایمز قئزئتینده یئر آلان مقاله‌ده، بیر میلیون مسلمان اویغور تورکونون زورونلو ائییتیم کمپلرینده کمونیسم پروپاگانداسینا معروض قالدیغی، ایسلام اؤلکه‌لرینین ده بونا سس سیز قالدیغی سؤزلری یئر آلدی. 

مصطفی آغیول طرفیندن قلمه آلینان مقاله‌ده، دوغو تورکیستانین سینجان بؤلگه‌سینده‌کی زورونلو ائییتیم کمپ لری، سوویتلر بیرلییینین کمونیست لیدری لئنینین باشلاتدیغی و استالینین سوردوردویو قولاق تاخیم آدالارینداکی زورونلو چالیشما کمپلرینه بئنزدیلدی.

سوویتلر بیرلییی طرفیندن قولاق تاخیم آدالاریندا سونو اؤلومله بیتن چالیشما کمپلرینده موخالیفلر اویقولانان بو وحشت ۱۹۷۳ ایلینده روس یازار آلکساندیر سولزه‌نیتسین طرفیندن یازیلان ‘قولاق آرشیپلاقو’ آدلی کیتابلا اورتایا چیخاریلمیشدی. 

نیویورک تامیزین مقاله سینده سوویتلر بیرلییی کمونیست پارتیسینین ائتدیگی بو ایشکنجه ایندی باشقا بیر کمونیست پارتی طرفیندن سنّی مسلمان اویغور تورکلرینه‌ قارشی اولوندوغوندا دیققت چَکدی. 

" ایسلام اولکه‌لرى بونا سئسسیز " 

دوغو تورکیستانین سینجان بؤلگه‌سینده قورولان چینین "ینئیدن ائییتیم کمپلری’نده بیر میلیون محبوس مسلمانا زورلا چین کمونیست پارتیسینی ساوونان ایدولوژیک دانیشیقلار، ماهنی لار دینلتیلدیگی، ایسلام اؤلکه‌لرینین بونا سئسسیز قالدیغی یازیلدی. مقاله ده، چینین دونیانین ایکینجی بویوک اقتصادی اولماسی و ایسلام اؤلکه‌لری تشکیلاتینا عضو اولان ۵۷ اؤلکه‌نین ۲۰سینین چینین اَن یاخشی تجارت اورتاغی اولماسی سببی ایله بو ظولمه سئسسیز قالدیقلاری و چینین بو اؤلکه‌لره سوس پایی اولاراق یاردیم ائتدیگی ادعا ائدیلدی. چینده مسلمانلارین ساققال وورماغی، اوروجلوق دا اوروج توتماسینین یاساق ائدیلدییی و مسلمانلارا یئمه‌سی حرام اولان دونگوز ائتی یئمی و الکل ایچمه گه زورلاندیغی بللی اولدو.

چینلی یئتکیلیلرین اویغورلار آراسینداکی ایفراطی لر طرفیندن آلارما گئچدیکلرینی سؤیله‌دیکلری بیلدسرن مقاله‌ده، بو اینسانلارین بیر آووج اولدوغونو و بونون سببینی ده مسلمانلارا ایللرجه اویغولانان باسقینین سونوجو اورتایا چیغتیغی بیلدیریلمیشدی.. 

چینین مسلمانلارا اویغولادیغی باسقیلارا قارشی یالنیزجا مالزیالی سیاستچی انور ابراهیم و پاکیستانین دین ایشلری باخانی نور حق قادری اعتراض ائتمیش، آنجاق سون زامانلاردا ایسلام ایشبیرلییی تشکیلاتی نین چینده مسلمانلارا قارشی توتوملارلا ایلگیلی خبرلربن جان سیخیجی اولدوغونو آچیقلادیغی وورغولاندی.

آردینی اوخو
یکشنبه 21 بهمن 1397
بؤلوملر : سیاست,

آنا یاسانین ۱۵ اینجی اصلینه فرق لی باخیش

0 گؤروش
یازار:‌ ائلدار

۱۵ اینجی اصل ساده جه و ساده جه تورک دیلینه قارشی آنا یاسادا یئرلشدیریلیبدی. ایراندا ایکی گرچک و باغیمسیز دیل وار. عرب و تورک دیلی. عربجه نین وجودو ۱۶ اینجی اصله دایاناراق اسلام و قرآن دیلی کیمی تانینیب و رسمی ائیتیمی گرکلی ساییلیب. فارسی آدلانان دیل، دیلچیلیک بیلیمی باخیمیندان باغیمسیز بیر دیل اولمادیغی و سؤزلرینین ۸۰ فاییزی عرب، تورک ولاتین دیل لریندن آلیندیغینا رغمن، اؤلکه نین تکجه قوندارما رسمی دیلی کیمی یئر آلیب. باشقا دیللر باغیمسیز دیل دئییل دری ناقص قوندارما دیلینین لهجه لری سیراسیندادیلار. بو اوزدن ۱۵ اینجی اصلین اجراسینی هایقیرانلار بیرداها اوتوروب اونو دیقتله اینجه له ییب گؤرمه لی دیلر کی تورک دیلینه آنا یاسادا یئر یوخدو. ایراندا بیر رسمی بیرده اسلام دیلی وار. باشقا دیللر بؤلگه سل دیللر حددینه دوشورولوب لر کی اونلارین اویغولانماسینا قانونی باخیمنان حکومتین گرکلی گؤره وی یوخدو. آنجاق بو اصلی آنا یاسادا یئرلشدیرمک تورک دیلینی 
دانیب، آرادان قالدیریب، یوخ ائدیب، اونون یئرینه قوندارما فارس دیلینه رسمی یئر وئرمک دئمک دیر. مشروطه آنایاساسیندا دیل قونوسونا توخونولمامیشدی. بو اوزدن کیمسه فارسجانین رسمی و میللی دیل اولوب و باشقا دیللرین غیررسمی اولماسی کیمی قونولاردا تارتیشا بیلمزدی. اسلامی دئوریمدن سونرا ۱۳۵۸ اینجی ایلده آنا یاسانی حاضیرلاماق پروسه سینده بوآنتی تورک اصل یئرلرشدیریلیب رفراندوما سونولدو. آنجاق دیلیمیزین یازیلیب ،اوخونماسی، رسمی اولماسی و رسمی دولت ائیتیم، اؤیرتیم سیستمینه گیرمه سینین یولو  ۱۵ اینجی اصلین اجراسیلا دئییل تام ترسینه یانلیز اونو آرادان قالدیریب یا اصلاح ائتمه سیله اولابیلر. بو ماده ده ایرانین رسمی واورتاق  دیلی فارسجادیر. سندلر ، یازیشمالار و درس کتابلاری بو دیلده اولمالیدیر. آما اوندان یاناشی بولگه سل دیللرین باسینلاردا قوللانیلماسی و ادبیاتینین ائیتیمی اؤزگوردو. بورادا فارس دیلی "رسمی واورتاق" دیل آدلاندیریلیب آما هر یئرده ملی دیل کیمی میداندا آتینی چاپیر. نه یازیق کی بو اؤنملی و اینجه مساله یانی "رسمی و اورتاق" مفهومو میللی سؤزو ایله ائشید توتولور و توپلومدا حتی اوزمانلار طرفیندن فرقلندیریلمیر. بو اصل اساسیندا تورک دیلی هیچ زامان رسمی اولاماز. بو دیلده رسمی ائیتیم آلیناماز، سؤزده اؤیرنیلمه سینه مانع یوخدور آما عمل یاساقدیر. ائیتیمینه دولتین گؤره وی یوخدور. گؤرونور کی بو اصل تورک خالقینین کیملیک سیمگه سینی یانی دیلینین یوخ ائتمه سینی قانونلاشدیراراق هر طورلو تارتیشما و انتقاد یولونو قاپادیب. بیز بو اصلین اجراسینی دئییل بلکه آنا یاسانین ۱۷۷ اینجی اصلینه دایاناراق اونون حذف یا اصلاح اولونماسینی ایسته مه لی ییک. بو ماده وحی دئییل کی توخونولمایا بلکه تام ترسینه بوتون اخلاقی وانسانی و بشر حاقلاری قوراللارینا هایکیری دیر. بو اصلی قبول ائدیب اونون اجراسینی ایسته مک، فارس دیلینین رسمی لیگی و تورک دیلینین غیر رسمی و غیر ملی  و بولگه سل اولماسینین اقراری دئمک دیر. انسانی کرامت و شرافتیمیزی بیر قارا پارایا ساتماق دئمک دیر. َن دوغال و انسانی حاققیمیزین بیر کیچیک بؤلومونو یالوارماقلا فارس شوونیستیندن دیلنمک آنلامیندادیر. حاق، میننت و یالوارماقلا دئییل، منطق و حقوق و شرع قوراللارینا دایاناراق، گوج و اراده ایله آلینار. ۱۵ اینجی اصله گووه نیب، دیل حاققیمیزی بو سئویه یه ائندیرمک مطلق یانلیشلیقدیر.

سلیمان باری

آردینی اوخو
شنبه 20 بهمن 1397
بؤلوملر : یازارلار,

نییه تورکجه اؤیرنمه‌لییک؟

0 گؤروش
یازار:‌ ائلدار


۸۳ میلیون اینسان آنا دیلی اولاراق تورکجه دانیشیر، دونیانین ۱۵جی اَن چوخ دانیشیلان دیلیدیر. بیر او قدر ده اینسان ایکینجی دیل اولاراق تورکجه دانیشیر. 


تورک مدنیتینی و طرزینی بَیَنَنلر اوچون تورکیه‌ده اوخوماق ایده آلدیر. حتّی یئرلی دیلی دانیشماسان بئله بوتون یئرلر اوچون گؤزلدیر. اگر یئرلی دیلئ بیلسَز بوتونلوکله هرشئی سیزه راحات اولاجاق – اینسانلارلا مذاکره، مدنییتی اؤیرنمه و ... .

تورک دیلی اورال-آلتاییک قروپونا مخصوصدور و فین – ماجاریستان دیللریله ده علاقه سی واردیر. لاتین الیفباسی ایله ۹۰٪ اینسان طرفیندن یئرلى دیل اولاراق یازیلمیشدیر. تورکجه سونرادان علاوه دیل اولاراق داخیل ائدیلمیش، معنا اولاراق سؤز کؤکونه سون شکیلچی علاوه ائتمکدیر. 

مُعاصیر تورکجه ایستانبول لهجه سینه اویغون نظرده توتولسا دا، تورکیه‌نین هر هانسی بیر یئرینده تورکجه اؤیرنمک کیمی بیر شانسینیز واردیر. تورکجه اؤیره‌نیلمه‌سی اوچون بیر چوخ کورسلار دا واردیر.

آردینی اوخو
جمعه 19 بهمن 1397
بؤلوملر : تورک دیلی,

اورمو گؤلو اوچون آلماندا کیتاب چاپ اولوندو

0 گؤروش
یازار:‌ ائلدار


"رگه های شور" آدلی کیتاب اورمو گؤلو اوچون آلمانجا، اینگیلیزجه و فارسجادا آلمانین بُن شهرینده کاوه مناف زاده و حسین محمودی نین اورتاق چالیشماسیلا یاییملاندی. 

حیوانلار دونیاسی، آدالار، گؤی عکسلری، اینسانی مُستندلر، طبیعت، اورمو گؤلونون گؤزَللیکلرى، چایلار، گؤللر، اینسانى فعالیتلر و اونون اورمو گؤلونه تاثیری و ... بو کیتابین موضوع لارینی تشکیل ائدیر. 

بو کیتابدا چالیشیلیب اورمو گؤلو اوچون بیر مُستند اثر دوزَنلنسین و اورمو گؤلونون تانینمایان گؤزللیکلرى، پتانسیل لری و زیست محیط سورونلاری، عکس دیلی ایله دئییلسین و دونیانین باخیشی بو طبیعی و بؤیوک گنجه داها آرتیق جلب اولونسون.

آردینی اوخو
جمعه 19 بهمن 1397
بؤلوملر : کیتاب,

تورکونو یازمازلار کی، دانیشارلار!

0 گؤروش
یازار:‌ ائلدار

۱۳۷۹جو ایلده بیر سیرا اؤیرنجی یولداش‌لارلا بیرلیکده تبریز بیلیم‌یوردوندا تورکجه دیل کیلاسی قورماق قرارینا گلدیک. آنجاق، بو ایشه گؤره، تبریز بیلیم یوردونون فرهنگی ایش‌لر یاردیمچیلیغیندان مجوز آلمالیییدیق. بونا گؤره ده ایسته‌یییمیزی بیر کاغیذا یازیب، وورغولادیغیم قوروما باش ووردوق. اورادا بیر منشی خانیم وار ایدی. بیزی گؤرجک اورا باش ووردوغوموزون ندنینی سوروشدو. آنا دیلیمیزی اؤیرنمک اوچون تورکجه دیل کیلاسی قورماق ایسته‌دیییمیزی دیله گتیردیییمیزده، چاشباش قالیبان سوروشدو:

- "یانی نهههه؟! آنا دیلیمیزی باشاریروخ داااا"
اونون سؤزونه یانیت اولاراق دئدیم: "یوخ، بیز باشارمیریق، سیز باشاریرسینیزسا بیر صفحه تورکو یازی یازین بیزه؟!"
چاشباش قالمیش خانیم منیم بو سؤزومو ائشیتدییینده مات-مات بیزه باخاراق "آخی تورکونو یازمازلار کی، دانیشارلار دا"! دئیه یانیت وئردی. منسه "دئییرسینیز من ایکی صفحه یازیم" دئیه‌رک "دیل باجاریق‌لارینین بیری دانیشماقدیرسا باشقاسی ایسه یازماقدیر" سؤزونو آنلاتماغا چالیشدیم...

ی س: ایندی آز-قالا ییرمی ایل بو اولایدان کئچیر. بو ییرمی ایلده هئچ نه قازانماساق دا، اَن آزی چوخلارینی باشا سالمیشیق کی تورکجه‌نی یالنیز دانیشمازلار، بلکه یازارلار دا... بونو بوگون دیلیمیزین دوشمن‌لری ده بئله بیلیرلر.

محمد رحمانی فر

آردینی اوخو
پنجشنبه 18 بهمن 1397
بؤلوملر : یازارلار,

سرطان سِلولونون عامیلی تاپیلدی

0 گؤروش
یازار:‌ ائلدار


استنفورد بیلیم یوردونون آراشدیریجی لارینین دئدیگینه گؤره، سرطان سلولونون عامیلینی تاپماغی، سامانلیق دا اینه تاپماغا بَنزدیب لر و بو سلولو تاپماق اوچون چوخلو تحقیق لر آپاریلماسی نی بیلدیریب لر.

بو بیلیم انسان لاری، سرطانین علاجین دا یئنی بیر وضعییتین یارانماسینا ایشاره ائدیب و آرتیق شیمی درمانی کیمی علاج لار یوخ، بلکه داوا درمانلا سرطانین قاباغینی آلابیله جکلرینی دئییب لر.

سرطانی مریض لرین ساییسی دونیادا گونو گوندن چوخالماقدادیر و سون خبرلره گؤره بو آمار ۲۸% چوخالیب دیر.

آردینی اوخو
پنجشنبه 18 بهمن 1397
بؤلوملر : بیلیم,

نامه صدیق درگیسی نین بیرینجی ساییسی یاییملاندی

0 گؤروش
یازار:‌ ائلدار


آذرساوین خبرینه گؤره، نامه صدیق اوچ آیلیق درگی دیر و آذربایجان تورکجه‌سی، تورکیه تورکجه‌سی، اینگیلیزجه و فارس دیللرینده یاییملانیر. 

بو درگینین بیرینجی سایی باش موضوع سو، ایراندا تورک دیلی و ادبیاتینین سون ۴۰ ایلده‌کی دورومو و ایسلامی اینقیلابینین تاثیری اؤلکه‌ده‌کی دیللره و آغیزلارادیر. 

درگینین بیرینجی ساییسی بو ایلین بهمن آییندا یاییملانیب و درگینین جیلدینده‌کی شکیل، محمدعلی جدیدالاسلامین ایران خالقینین ایسلامی اینقلابیندان گؤرونمه‌میش شکیللردندیر. 

درگینین یؤنتمه‌نی اوستاد دوزگونون اوغلو، ائلدار محمدزاده صدیق دیر. 

درگینی آلماق اوچون بو نومره‌یه زنگ آچین. 

09125244761

آردینی اوخو
پنجشنبه 18 بهمن 1397
بؤلوملر : درگی,